Асан Джалилов
Парламент палаталарының бірлескен отырысында Алатау қаласына арнаулы мәртебе беру туралы Конституциялық заң жобасы бірінші оқылымда қолдау тапты.
Бұл бастама Мемлекет басшысының Жолдауында айқындалған тапсырмаларға және қаланы кешенді дамыту жөніндегі стратегиялық құжаттарға негізделген. Негізгі мақсат – Алатауды қысқа мерзім ішінде қарқынды дамитын, инновация мен инвестиция тартатын жаңа орталыққа айналдыру.
Үкімет өкілдерінің мәліметінше, қазірдің өзінде жалпы құны 1,8 трлн теңгені құрайтын 44 инвестициялық жоба дайындалған. Аталған жобалар жүзеге асса, шамамен 30 мың жаңа жұмыс орны ашылады. Бұл қалада ғылым, медицина, туризм және жоғары технологиялар саласының дамуына серпін береді.
2030 жылға дейінгі даму жоспары бекітіліп, инфрақұрылымды кезең-кезеңімен қалыптастыру көзделіп отыр. Сарапшылардың болжамынша, ұзақ мерзімді перспективада Алатау өңірлік экономиканың ірі драйверіне айналып, 2050 жылға қарай оның жалпы өнімі 50 млрд АҚШ долларына жетуі мүмкін.
Заң жобасы қабылданған жағдайда қалада арнайы құқықтық режим енгізіледі. Бұл бизнес жүргізу, инвестиция тарту және экономикалық дауларды реттеу механизмдерін жеңілдетуге мүмкіндік береді. Мұндай модель халықаралық тәжірибеде «charter cities» форматына сәйкес келеді.
Сонымен қатар, жаңа басқару жүйесі енгізіледі. Қаланың стратегиялық дамуын арнайы кеңес айқындайды, ал күнделікті басқаруды атқарушы орган жүзеге асырады. Бұл тәсіл шешім қабылдауды жеделдетіп, тиімділікті арттыруға бағытталған.
Алатау қаласы бастапқыдан толық цифрлық қағидаттарға негізделіп дамиды. Мұнда жасанды интеллект, роботтандыру, автономды көлік және цифрлық инфрақұрылым салаларында тәжірибелік құқықтық режимдер енгізіледі.
Жалпы, бұл жоба Қазақстанда жаңа буындағы қалаларды қалыптастырудың үлгісіне айналуы мүмкін.
